BORË NË TIRANË

Reshjet e dëborës me një intensitet të konsiderueshëm kanë mbuluar edhe Tiranën gjatë pasdites të së martës. Një gjë e tillë ishte parashikuar më herët nga sinoptikanët. Kështu temperaturat janë ulur me disa gradë në kryeqytet dhe vala e të ftohtit pritet të përfundojë nga fundi i kësaj jave. Ndërkohë që edhe më herët gjatë mëngjesit në Tiranë ranë reshje të dobëta dëbore. Sipas parashikimeve veç ditës së sotme në kryeqytet do të ketë reshje dëbore edhe gjatë së mërkurës. Edhe gjatë janarit të vitit të kaluar Tirana u përfshi nga reshjet e dëborës. Nga ana tjetër Autoriteti Rrugor Shqiptar dhe Policia Rrugore ju bëjnë thirrje drejtuesve të mjeteve të tregojnë kujdes, të lëvizin me shpejtësi të kufizuar dhe të respektojnë në mënyrë rigoroze Kodin Rrugor. Sakaq Autoriteti Rrugor Shqiptar bën me dije se “kompanitë e mirëmbajtjes dhe forcat e shtuara te Policisë Rrugore janë në terren për të garantuar ndërhyrjen në kohë sa më të shpejtë”. Rënia e temperaturave ishin paralajmëruar nga meteorologët pas erërave siberiane që kishin pushtuar fillimisht veriun e Europës dhe më pas kishin zbritur drejt Mesdheut duke zbardhur qytete si Napoli dhe Roma në Itali.